येँ/येँ महानगरपालिका वातावरण व्यवस्थापन विभागया ग्वसालय् व कलावाटिका नाट्य समूहया न्ह्यब्वया फोहरमैला व्यवस्थापनसम्बन्धी सचेतनामूलक सडक नाटक ‘झीगु रहर बांलाःगु सहर’ येँया दमाइ टोल, लगन टोल, बसन्तपुर, असन लगायत थीथी थासय् मञ्चन जुल ।
येँ महानगरपालिकां फोहरमैला समुचित व्यवस्थापनया निंतिं १० गू वडाय् ध्वगीगु, ध्वगीमखुगु, सिसाजन्य व डाइपर, स्यानिटरी प्याड थेंजाःगु फोहरयात वर्गीकरण यानाः उपभोक्तापाखें फोहरमैला संकलन यानाः वयाच्वंगु खः । थुगु हे अभियानयात थप विस्तार यायेगु लक्ष्य तयाः नगरवासीपिन्त सचेतना जगेयायेगु उद्देश्यं थ्व नाटकया ग्वसाः ग्वःगु खः । सडक नाटक मञ्चनयात थप व्यवस्थित व प्रभावकारी यायेगु निंतिं महानगरपालिकाअन्तर्गत्या ३२ गू वडाया जनप्रतिनिधि व कर्मचारीपिन्त नं ब्वति कायेगु निंतिं पत्राचार यानागु खँ वातावरण विभागया विभागीय प्रमुख सरिता राईनं धयादीगु दु । विभागीय प्रमुख राईनं समुदायलय् थीथी तालिम, माइकिङ थेंजाःगु ज्याझ्वः न्ह्याकावयाच्वनागु व जनतायात फोहरयात स्रोतय् परिणत यायेत व सहरयात स्वच्छ सफा यानातयेगु उद्देश्ययात प्रभावकारी यायेगु निंतिं थज्याःगु सडक नाटक मञ्चनं टेवा बीगु विश्वास यानागु खँ धयादिल ।
वातावरण समितिया संयोजक नापं १२ नम्बर वडाया वडा अध्यक्ष बालकृष्ण महर्जनं फोहर व्यवस्थापनय् लापर्वाही याःसा नागरिकयात गुलितक नकारात्मक असर लाइ धइगु सन्देश थ्व नाटकं ब्यूगु दु धयादिल । वय्कलं महानगरपालिकां स्वच्छ वातावरण कायम यायेत न्ह्याकूगु थीथी पहलमध्ये थ्व नं प्रभावकारी जूगु धयादिल । अथे हे कलावाटिका नाट्य समूहया अध्यक्ष, नाट्य टोली संयोजक नापं नाटककार चन्द्रप्रसाद पाण्डेयं महानगरपालिकाया स्वच्छ वातावरण कायम यायेगु अभियानय् स्थानीय वासिन्दा, सरोकारवाला व्यक्तित्वपिंनापं प्रत्यक्ष स्वापू तयाः ज्या यायेखंगुलिं गर्वया महसुस जूगु खँ धयादिसें वय्कलं थ्व सडक नाटक जेठ ३१ गते आइतबार स्वयम्भू व न्हू बसपार्कय् मञ्चन, असार १ गते सोमबार सुथय् बौद्ध स्तूपा व न्हिनय् न्हू बानेश्वरय् व लिपांगु दिं असार २ गते मंगलबार न्हिनय् नक्साल नारायण चौरय् व सन्ध्याइलय् भृकुटीमण्डपय् मञ्चन जूगु खँ धयादिल ।
चन्द्रप्रसाद पाण्डेयया च्वसाय् तयार जूगु थुगु नाटकया निर्देशन कृष्णभक्त महर्जनं यानादीगु खः । कृष्णभक्त महर्जन, कुन्दन शाक्य, मायादेवी श्रेष्ठ, गोविन्द थापा, राजु खतिवडा, सुमित सिंह रावल, बिमला सापकोटा, रविना कँडेलं अभिनय यानादीगु थुगु नाटकय् व्यवस्थापन सन्देश पाण्डेय व सहजकर्ता विष्णु चुडाल जुयादीगु दु ।
