यल/ताम्रकार कुलदेवता उग्रचण्डी माई संरक्षण समिति (ताम्रकार समाज), भजन उपसमितिया ग्वसालय् व यल महानगरपालिया उद्योग, पर्यटन व संस्कृति संरक्षण समितिया ग्वाहालिइ खुलान्यंक जूगु भजन प्रशिक्षणया समापन ज्याझ्वःया उलेज्या मूपाहां यल महानगरपालिकाया उपप्रमुख मञ्जली शाक्य वज्राचार्यं यानादिल । समाजया नायः विनोद ताम्रकारया सभापतित्वय् जूगु उगु ज्याझ्वलय् यल मनपा वडा ल्या ६ या वडा अध्यक्ष रुपेन्द्रराज शाक्य, समाजया निवर्तमान नायः रविन्द्रराज ताम्रकार लगायतं पाहांकथं आसन ग्रहण यानादीगु खः ।
समापन ज्याझ्वलय् न्वंवासें मूपाहां वज्राचार्यं धार्मिक, सांस्कृतिक व भजन–कीर्तनं समाजय् सकारात्मक ऊर्जा प्रवाह याइगुनापं थज्याःगु ज्याझ्वलं झीगु परम्परागत संस्कृति संरक्षण व न्हूगु पुस्ताय् थुकिया हस्तान्तरण जुइगु खँ धयादिल । अथे हे समाजया नायः विनोद ताम्रकारं भिंतुना न्वचु ब्युसें भजन प्रशिक्षणं ब्वतिकाःपिन्त सांगीतिक व सांस्कृतिक चेतना अभिवृद्धि याइगु खँ धयादिसे थज्याःगु ज्याझ्वः न्ह्याकावनेगु प्रतिवद्धता प्वंकादिल ।
गायन, हार्मोनियम, तबला व नगडाय् प्रशिक्षण ब्यूगु उगु प्रशिक्षणय् ६० म्हेसिनं ब्वति काःगु खः । ज्याझ्वलय् प्रशिक्षार्थीपिन्सं थीथी भजन न्ह्यब्वःगु खःसा वय्कःपिन्त दसिपौ नं लःल्हाःगु खः ।
