यल/ललितपुर उद्योग वाणिज्य संघ, पर्यटन, संस्कृति तथा सम्पदा समितिया ग्वसालय् व पाटन स्टे एसोसिएसननापंया सहकार्यय् यलय् पर्यटन व्यवसायया सम्भाव्यता विषयलय् वरिष्ठ पर्यटनविद् कर्ण शाक्यनापं अन्तक्र्रिया ज्याझ्वः जुल ।
संघया अध्यक्ष विश्वराज वज्राचार्यया सभापतित्वय् जूगु उगु ज्याझ्वलय् पर्यटनविद् शाक्यं पर्यटन अति गतिशील व न्ह्याबलें क्रियाशील उद्योग खः । थ्व गुबलें अन्त्य मजुइगु, निरन्तर परिवर्तन जुयाच्वनीगु ख्यः खः । थन पूर्णविराम दइमखु, केवल अल्पविराम जक दइ, छाय्धाःसा थन ‘बासी माल’ चुइमखु । पर्यटन न्ह्याबलें ताजापन मालेगु, न्हूगु मीगु व जीवनय् न्हूगु ताजा फय्या सासः ल्हायेगु खः — Tourism is the breath of fresh air.जिं पर्यटनया थीथी कालखण्डत स्वयाग दु । ६० या दशकया पर्यटन, गन आत्मखोज मूखँ खः । अनंलिपा संगठित पर्यटन व थौं वयाः प्रविधिइ आधारित, प्रतिस्पर्धात्मक युग । प्रत्येक चरणय् पर्यटनयात न्हूगु रुप बियाच्वंगु दु तर थुकिया मूल तत्व वहे खः — न्हूगु अनुभव, न्हूगु अनुभूति व न्हूगु ऊर्जा । जिं पर्यटन पेशां अवकाश कयागु झिदँ दयेधुंकल । थौं यलय् विकसित जुयाच्वंगु होमस्टे पर्यटनबारे खासै प्रत्यक्ष अनुभव मदुसां नं जिं थूगुकथं पर्यटन केवल व्यवसाय जक मखु, थ्व मानव मनोविज्ञानयात थुइकेगु व व्यवस्थापन यायेगु विज्ञान खः । कला नगरी यल हस्तकला व पर्यटनया यक्व सम्भावना दुगु शहर खः । उकिं यलया मौलिक पहिचान, सम्पदा संरक्षण व समुदायलय् आधारित पर्यटन विकासयात प्राथमिकता बियाः पर्यटन क्षेत्रया विकासया निंतिं निजी क्षेत्र, स्थानीय समुदाय व सरोकारवाला निकायदथुइ सहकार्य आवश्यक जूगु खँ धयादिल ।
पाटन स्टे एसोसिएसनया अध्यक्ष प्रकाश राजभण्डारीं थुगु एसोसिएसनं सम्पदा क्षेत्रय् पर्यटकया बसाई ‘Heritage Stay in Patan’ अवधारणायात पर्यटकमैत्री गन्तव्यया रूपय् विकास यायेगु उद्देश्यं ज्या यानाच्वनागु खँ न्ह्यथँसें थुकिया निंतिं स्थानीय सरकार, संघसंस्था, निजी क्षेत्र व समुदायदथुइ प्रभावकारी सहकार्यया आवश्यकता जूगु खँ धयादिल ।
यलया ऐतिहासिक, सांस्कृतिक सम्पदाया महत्वयात पर्यटननापं प्रभावकारी रूपं जोडेयानाः आन्तरिक व वाह्य पर्यटकत आकर्षित यायेगु खँय् विस्तृत रुपं सहलह जूगु उगु ज्याझ्वलय् संघया वरिष्ठ उपाध्यक्ष सुसन महर्जनं सुभाय् न्वचु बियादीगु खःसा संघया महासचिव भुमिनन्दन कर्माचार्यं ज्याझ्वः न्ह्याकादीगु खः ।