येँ/नेप्लीज फेसन होमया ग्वसालय् नेवाः मिसा मस्तय्तगु प्रतिभामूलक प्रतिस्पर्धा मिस लिटिल नेवाःया १५ क्वःगु संस्करणय् शनिबार ट्यालेन्ट शो ज्याझ्वः जुल । गौशालाय् च्वंगु होटल पौवाय् जूगु उगु ट्यालेन्ट शोलय् ९ निसें १३ दँतकया २० म्ह प्रतिस्पर्धीपिन्सं थःथःगु प्रतिभा न्ह्यब्वःगु खः ।
ब्वतिकाःपिं मस्तय्सं हुलाप्याखं, स्केटिङ, जिम्न्याष्टिक, चित्रकला, भ्वाइलीन, धिमे, कुमारी नृत्य, बज्रयोगिनी नृत्यनापं विविध प्रतिभा न्ह्यब्वःगु खःसा अप्वसिनः नेवाः म्येय् प्याखं हुलाः थःगु प्रतिभा न्ह्यब्वःगु खः । ज्याझ्वलय् सफू बज्राचार्य, नेभा डंगोल, क्रिस्टिना खड्गी, श्रेया बलामी, प्रिन्सिका शाही, आरोग्या महर्जन, समृद्धि खड्गी, आन्या महर्जन, सुरवी बज्राचार्य, अर्शिया महर्जन, देजला शाक्य, रिपान्शी श्रेष्ठ, सचिका महर्जन, रोजलिन शाक्य, श्रीषा श्रेष्ठ, सहिना शाक्य, बिदिशा महर्जन, क्रिस्टिना महर्जन, सस्था मानन्धर व लिडिया महर्जनं ब्वतिकाःगु खः ।
ट्यालेन्ट शोया निर्णायकय् अधिवक्ता लक्ष्मन महर्जन, लायन्स क्लब काठमाडौं डिष्ट्रिकया सल्लाहकार मनकृष्ण श्रेष्ठ, डा.शिक्षिता श्रेष्ठ, नमुना फेसन कलेजका भाईस प्रिन्सिपल जिवेश्वरलाल श्रेष्ठ, बाँसुरीवादक सचिन महर्जन, नेवाः संकिपाया प्याखंम्वः हिसिला महर्जन, नेपालभाषा प्रशिक्षक राजु नापित व मिस लिटिल नेवाः नयना शाक्य जुयादीगु खः ।
ग्वसाः खलः नेप्लीज फेसन होम व फाइट फर लाइफ नेपालया अध्यक्ष हेमा मानन्धरया सभापतित्वय् जूगु उगु ज्याझ्वलय् आरडी फाउन्डेसनया फाउन्डर डा. देवकाजी डंगोल मूपाहाँकथं झायादीगु खःसा ज्यापु समाज यलया नायः सन्तमान महर्जन, मिस लिटिल नेवाः ११४१ आर्या श्रेष्ठ, मिस लिटिल नेवाः ११४३ सुज्योति डंगोल, सह–आयोजक दिलकुमार महर्जन लगायत पाहाँकथं झायादीगु खः । ज्याझ््वलय् ब्वतिकाःपिनिगु हेयर व स्किन टेस्ट नं याःगु खः, गुकी ब्युटिसियन सोनी रञ्जितकार व मीना श्रेष्ठ निर्णायक जुयादीगु खः ।
मिस लिटिल नेवाः – ११४५ या दकले लिपांगु प्रतिस्पर्धा माघ ५ गते येँ जुइगु खँ ग्वसाः खलकं धाःगु दु । उगु ज्याझ्वलय् मिस नेवाः सकिना महर्जन, मिस नेवाः प्रलिशा शाक्य व मिस नेवाः सामाजिक कल्याण एम्बासडर चिफ तिमिला महर्जनं कोरियोग्राफी व मिस नेवाः कृषा महर्जनया संयोजनय् ज्याझ्वः जुइगु खँ नं ग्वसा खलकं धाःगु दु ।